Një vrasje e rëndë ka ndodhur mëngjesin e sotëm në fshatin Kijevë të Malishevës, ku nipi ka vrarë xhaxhanë e tij dhe dyshohet se konflikti mes tyre ka nisur për çështje prone.
Policia e Kosovës ka konfirmuar se sot rreth orës dhjetë të mëngjesit është raportuar për një rast vrasjeje në fshatin Kijevë të Malishevës. Pas daljes në vendin e ngjarjes, është gjetur një person i moshës madhore që dyshohet se ishte pa shenja jete.
Vdekjen e tij siç konfirmon policia e ka konstatuar ekipi mjekësor në venin e ngjarjes. Për rastin është arrestuar një i dyshuar derisa hetimet po vazhdojnë.
“Sot rreth orës 09:50 është raportuar për një rast vrasje në fshatin Kijevë-Malishevë. Në vendin e ngjarjes, menjëherë kanë dalë njësitet e nevojshme policore ku është gjetur një person mashkull (i moshës madhore dyshohej pa shenja jete). Vdekjen e tij e ka konstatuar ekipi mjekësor në vendin e ngjarjes. Lidhur me rastin është arrestuar një i dyshuar, mashkull i moshës madhore. Rrjedha e mëtejme hetimore është duke vazhduar në koordinim me prokurorin e shtetit në drejtim të veprës penale të vrasjes”, ka thënë Sheremet Elezaj nga Policia e Kosovës.
Viktima është rreth moshës 60-vjeçare derisa i dyshuari për vrasjen rreth moshës 37-38 vjeçare. Motivi dyshohet se ka qenë për çështje pronësore.
